الورشة رقم 1 - بوليرو ابو ورده ع الظهر

بسم الله الرحمن الرحيم،،

اخواتى اعضاء المنتدى، بعد حصولى ع موافقة ادارة المنتدى ف تنزيل ورشة لكل منتج، احب ابدأ ع بركة الله اول ورشة للموديل دا (صورته تحت)،
بسم الله توكلنا ع الله
اولا احب اوضح اختصارات هستخدمها ف الشرح - س = سلسلة و ع = عمود
ثانيا ياريت اى تعليقات تكون بعد نهاية الموضوع عشان يكون سهل الحصول عليه مرة واحدة
ثالثا احب ابدأ بتنزيل صورة الموديل اللى هشتغل بيه - وبالنسبة للموديل دا فيه صورة للامام وصورة للخلف.






نبدأ الشرح بسم الله...... انا بدأت بالظهر
الدور 1 = 8 س ونقفلهم بمنزلقة
الدور 2 = 16 ع ونقفلهم بمنزلقة.
الدور 3 = دور حشو على كل عمود من الدور 2 - هتحسي انها قوست منك بس مش تخافى.
الدور 4 = هنعمل غرزة حشو + 1 س - ع كل غرزة من الدور السابق ومانفوتش غرزة.
الدور 5 = ع على كل س من الدور السابق + 3 س.. وهكذا ونقفل الدور بمنزلقة.
الدور 6 = ع على كل ع من الدور السابق + 3 ع على كل 3 س من الدور السابق ونقفل الدور بمنزلقة.
هنوصل للشكل دا


الدور 7 = اطلع بـ 30 س ( وممكن تزوديهم ع حسب زوقك) وبعد مااخلصهم انزل بيهم ف نفس العين اللى بدأت منها وبعد كدا امشى بغرزة الحشو واعد وانا ماشية 7 ع من الدور السابق وعند العمود 8 ابدأ بـ 30 س تانى وانزل بيهم ف نفس المكان اللى بدأت منه وامشي بالحشو واعد وانا ماشية 7 ع من الدور السابق وعند العمود 8 ابدأ بـ 30 س تانى وانزل بيهم ف نفس المكان اللى بدأت منه وهكذا.... لو بصيتى ع الدور رقم 5 هتلاقي نفسك عاملة 30 س فوق عمود اه وعمود لا وعمود اه وعمود لا وهكذا لنهاية الدور

الدور 8 = امشى بمنزلقة مسافة 4 ع واخد لفة خيط وادخل ف اول س من 30 س واعمل اول عمود وتانى عمود في تانى س وهكذا لحد س 10 وبعدها اعمل 2 ع في س واحدة وامشى 3 عمود في 3 س واعمل 3 ع في س واحدة واعمل 3 ع في 3 س وبعدها 2 ع ف س واحدة وبعدين اكمل ال 30 س بعواميد عادى زى مابدأت وف آخر عمود انزل بيه بحشو او منزلقة في نص المسافة اللى بين كل 30 س والتانية ( هتلاقيها فوق العمود الفاضى اللى مش عليه 30 س ف الدور رقم 5 اللى اتكلمنا عليه من شوية) وهكذا مع كل 30 س اللى هيكونوا ف الاخر فروع او الورق بتاع وردة الظهر وعدد 8 فروع. ودا شكلهم



الدور 9 = نوصل كل ورقة من ورق الوردة بعدد 15 س من عند المكان اللى فيه عمودين من كل ناحية، ونمشي بمنزلقات من فوق الورقة عشان مااقطعش الخيط كل شوية.
الدور 10 = ناخد 15 س وننزل بيهم ف نص الـ 15 س ونعمل 15س وانزل بيهم ف نص ورقة الوردة من فوق واعمل 7س وانزل بيهم ف نفس المكان واطلع بـ 15س واروح بيهم ف نص 15 س من الدور السابق وهكذا حتى نهاية الدور.....

الدور 9 و 10 باينين ف الصورة اللى فوق

ركزوا معايا باه هنا... احنا لو عدينا كام مرة عملنا فيها 7س ف الدور السابقة هنلاقيهم 8 مرات ع عدد ورقات الوردة نرقمهم كدا ف دماغنا من 1 الى 8 ونكمل
الدور 11 = من عند 7س رقم 1 نعمل 10 س وننزل في نص المسافة بتاعت 15 س ف الدور السابق و 10 س تانى وهكذا ونيجى عند اللى 7 س رقم 2 و نعمل فوقها 7 س وننزل فيها تانى ونكمل 10 س ونوصل عند 7 س رقم 3 نعديها عادى بـ 10س ونكمل ونوصل عند 7 س رقم 4 نعممل زي ماعملنا اول مرة 7س وننزل ف نفس المكان ونكمل بـ10س ونعدى ال7س رقم 5 عادى وعند الـ7س رقم 6 نعمل 7س وننزل ف نفس المكان ونعدى الـ 7س رقم 7 عادى وعند ال 7س رقم 8 والاخيرة نعمل 7س وننزل ف نفس المكان نفضل ع كدا لحد الدور رقم 16.

الدور 17 = زى ماحنا بس الدور دا هنبدأه من قبل7س رقم 2 بأربع عيون وهننهيه بعد الـ7س رقم 8 بأرع عيون عشان نحرد الرقبة ونلف الشغل.
الدور 18 و 19= زى 17 بالظبط وفي النهاية هيتكون الشكل دا بعد حردة الرقبة



كدا انا هبتدى ف الصدر وهنبدأ من عند المروحة اللى ف الصدر... بس هشتغل من غير اللولى حاليا وهركبه ف الاخر (هو المفروض يتلضم ف الخيط ويتركب اثناء الشغل بس مش متوفر حاليا عندى)
الدور 1 = 10س
الدور 2 = 11 ع ونطلع ب4س ونلف الشغل.
الدور 3 = نعمل ع على كل عمود بس العمود رقم 5 نعمل فوقيه 3 ع وبعد كدا نكمل ع ع كل عمود لنهاية الدور وف الاخر 2 س ونلف الشغل.
الدور 4 = حشو + 1 س على كل ع من الدور السابق.
الدور 5 = عمود + 1 س ونطلع بـ 4 س ونلف الشغل
الدور 6 = ع على 1 س + ع على كل ع من الدور السابق ونطلع ب2 س ونلف الشغل.
الدور 7 = حشو + 1س زى الدور 4 ونطلع بـ 6 س ونلف الشغل.
الدور8 = 2 س ونفوت 1 س من تحت ونعمل 1 ع + 2 س ونفوت 1 س من تحت ونعمل 1 ع وهكذا لنهاية الدور ونطلع بـ 4 س ونلف الشغل
الدور 9 = 2 ع على 2 س من الدور السابق + 1 ع على ع من الدور السابق + 2 ع على 2 س من الدور السابق وهكذا ونطلع بـ 2 س ونلف الشغل.
الدور 10 = حشو + 1 س ونطلع بـ 8 س ونلف الشغل.
الدور 11 = نفوت 2 س من الدور السابق ونعمل 1 ع + 4 س ونفوت 2 س من الدور السابق ونعمل 1 ع وهكذا ونطل ع بـ 4 س ونلف الشغل.
الدور 12 = 3 ع على 4 س من الدور السابق + 1 ع على ع من الدور السابق + 3 ع على 4 س من الدور السابق وهكذا ونطلع بـ 2 س ونلف الشغل
الدور 13 = نفوت عمود من الدور السابق ونعمل غرزة حشو + 1 س ونفوت عمود من الدور السابق ونعمل غرزة حشو + 1 س وهكذا ونعمل 9 س ونلف الشغل.
الدور 14 = نفوت 1س من الدور السابق ونعمل ع + 5 س ونفوت 1س من الدور السابق ونعمل ع + 5 س ... وهكذا ونطلع بـ 1 س ونلف الشغل.
الدور 15 = نعمل 5 غرز حشو فوق 5 س من الدور السابق + غرزة حشو فوق ع من الدور السابق وهكذا حتى نهاية الدور.وهيكون الشكل كدا.



لو عدينا عدد العيون اللى اتكونت ف آخر دور ف الصورة اللى فوق هنلاقيها 14 عين
الدور 16 = نمشى بغرز حشو لحد مانوصل لاول عمود ونكون غطينا اول عين كلها + 10 س وانزل ف الغرزة اللى جنبها وامشى لغرز حشو واعدى العمود التالى واعمل فوق اللى وراه 10س وعلى كدا لنهاية الدور ( 10س فوق عمود اه وعمود لا) هيتكون عندنا 7 لسانات زى كدا,,,



الدور 17 = نبدأ ع طول بأول عمود بس تكون قاعدة العمود ف 10 س ونعمل 20 عمود على 10 س وآخر عمود انزل بيه على العمود الفاضى اللى مش عليه 10س بغرزة حشو وبعد كدا ابدأ ف 20 ع جديدة ف 10 س اللى بعدها وهكذا حتى نهاية الدور وهيكون الشكل كدا



دلوقتى بأه دا الشكل النهائى للصدر والظهر قبل التشبيك





ودا الشكل بعد التقفيل ( تقفيل بس ) مش تفنيش يعنى نقدر نقول تفنيش 50%.

ان شاء الله بكرة احطه بعد التفنيش 100%

دا الصدر



ودا الظهر




قبل ماانام حبيت اقولكوا ان كدا البوليرو خلص 100% ودى صورته النهائية عشان نقول ع الورشة رقم 1 كدا تم بحمد الله







معلش انا اتأخرت ف تنزيل الصور دى عشان مكنتش موجودة ف بيتنا من يوم الخميس وكنت عند اختى الكبيرة كنا بنطعم النونو الجديد ( عقبالى وعقبال كل اللى لسه ماتجوزوش زيي ربنا يرزقنا بالزوج الصالح واللى لسه ماجالهمش نونو ربنا يرزقهم بالذرية الصالحة يارب )

اشوفكم بكرة باذن الله ف الورشة رقم 2

تصبحوا ع خير

تسلم ايديكى وعنيكى يا حبيبتى
ورشة جميله وشرح واضح
جزاكى الله خيرا

تسلمى ياسمسم

.....عقبال الورشه الجديده ان شاء الله

ربنا يخليكى ياوردتنا .. ميرسي لذوقك

ما شاء الله يا أية شغلك مكتقن تسلم ايديكى

مقولتليش شوفتى موضوعى ولا ايه؟
انا قولت انزل الصور انا بدل ما اتعبك بس فشلت وبوظت الدنيا والصور نزلت مساحتها كبيرة وفيه صور مرضيتش تنزل مع انك نمزلتيها فى المنتدى القديم ياريت اذا فيه حاجة ممكن نصلح بيها اللغبطة دة ياريت تساعدينى انا عارفة انتى قولتى هتنزليهم انتى بس والله محبتش اتعبك

اهلا بيكى ياSabt ف منتدانا الجديد واسرتنا الجميلة .. نورتينا
اه شفت موضوعك ياحبيبتى ورديت عليكى وبعتذر انى اتأخرت ف تنزيلهم انشغلت بس ف شوية حاجات .. وان شاء الله في خلال دقائق هيكون شغلك نزل ف قسم اعرضى شغلك للبيع ولا تزعلى نفسك خالص
وبعتذر تانى انى اتأخرت ف تنزيل صور شغلك
وماتقوليش بتتعبينى تانى .. انا تحت امركوا ف اى حاجة تطلبوها

انا نزلتلك الصور ياSabt يارب يكون كلهم كدا ومكنش نسيت انزل صورة من اللى انتى باعتهولى انا شيلت الحاجات المتكررة بس